YouTube videoların montajı üçün süni intellekt funksiyasını təqdim edib

“YouTube” kontent yaradıcıları üçün video montajını asanlaşdıracaq yeni süni intellekt funksiyasını təqdim edib.

Marklife.az xəbər verir ki,  şirkət ötən həftə keçirilən “Made On” tədbirində “Conversational Editing” adlı yeni funksiyanı nümayiş etdirib. Funksiyanın “Shorts” video hazırlama alətinə və “YouTube Create” tətbiqinə inteqrasiya ediləcəyi bildirilib.

“Conversational Editing” kontent yaradıcılarına sadə mətn komandaları vasitəsilə videolarını redaktə etməyə imkan verəcək. Süni intellekt istifadəçinin verdiyi göstərişləri təhlil edərək müvafiq montaj dəyişikliklərini avtomatik həyata keçirəcək.

Bəs YouTube-un yeni AI montaj funksiyası necə işləyir?

Yeni sistem kontent yaradıcılarının telefonlarındakı müxtəlif video fraqmentlərini sadə mətn komandaları əsasında birləşdirə biləcək. Bu isə ilkin montaj prosesini əhəmiyyətli dərəcədə sadələşdirə bilər.

İstifadəçilər hazırlanan videonu daha sonra əlavə komandalar vasitəsilə təkmilləşdirə biləcəklər. Məsələn, sistemdən musiqi əlavə etmək, rəng filtrlərindən istifadə etmək, mətn və tipoqrafiyanı dəyişmək və ya videonun diqqətçəkən giriş hissəsini hazırlamaq istənilə biləcək.

Bundan əlavə, “Conversational Editing” istifadəçiyə layihəyə uyğun təkliflər də göstərəcək. “Musiqi əlavə et” və “rəng filtri əlavə et” kimi tövsiyələr montaj prosesində mümkün yaradıcı seçimləri xatırladacaq.

Süni intellektə “montajı mahnının ritminə uyğunlaşdır” və ya “ideal loop nöqtəsini tap” kimi daha konkret tapşırıqlar vermək də mümkün olacaq.

Bununla yanaşı, kontent yaradıcıları istənilən mərhələdə klassik manual montaj rejiminə keçərək videonun ayrı-ayrı elementlərini özləri redaktə edə biləcəklər.

Yeni funksiyanın xüsusilə video montajının texniki tərəflərinə bələd olmayan, lakin kreativ ideyalarını sürətli şəkildə videoya çevirmək istəyən kontent yaradıcıları üçün faydalı olması gözlənilir.