iPhone Duo satışa çıxmadan stok problemi ilə üzləşib

“Apple”ın ilk qatlanan smartfonu “iPhone Duo”ya ilkin sifarişlərin başlamasından cəmi bir neçə dəqiqə sonra tələbat artıb. Nəticədə bəzi modellər üzrə çatdırılma müddəti 2027-ci ilin yanvarınadək uzanıb.

Marklife.az xarici mediaya istinadən xəbər verir ki, “Bloomberg” jurnalisti Mark Qurman “Apple”ın istehsal imkanlarının məhdud olduğunu bildiyi halda cihazı eyni vaxtda 70-dən çox ölkə və regionda satışa çıxarmasını “böyük səhv” adlandırıb.

Mark Qurman gecikmələrin qatlanma mexanizmi və elastik ekranın istehsalı ilə bağlı çətinliklərdən qaynaqlandığını bildirib. Onun fikrincə, “Apple” istehsal imkanlarını nəzərə alaraq qlobal satışa başlamaq qərarını yenidən qiymətləndirməli idi.  

Məlumata görə, “iPhone Duo” üçün ilkin sifarişlər oktyabrın 16-da başlayıb. İlk 15 dəqiqə ərzində bəzi modellərin çatdırılma tarixləri dəyişib, yarım saat ərzində isə bir sıra rəng və yaddaş versiyaları üzrə gözləmə müddəti 2027-ci il yanvarın 25-dək uzanıb.

“Apple” isə cihaza yüksək maraq göstərildiyini və sifarişlərin mümkün qədər tez çatdırılması üçün çalışıldığını açıqlayıb.

Qeyd edək ki, 5,4 düymlük xarici və açıldıqda 7,6 düymlük daxili ekrana malik “iPhone Duo”nun ABŞ-də başlanğıc qiyməti 1 999 dollardır. Cihazın əlavə ehtiyatlarının nə vaxt satışa çıxarılacağı hələlik açıqlanmayıb.