“Coca-Cola” media tərəfdaşları bəlli oldu

İki ayrı tenderdən və həftələrlə sürən müzakirələrdən sonra “Coca-Cola” media tərəfdaşlarını seçib. Qlobal media işləri “WPP”yə, Şimali Amerika üzrə işlər isə “Omnicom”a həvalə olunub.

Marklife.az “Adweek”ə istinadla xəbər verir ki, bu, 2020-ci ildə “Coca-Cola”nın 4 milyard dollarlıq marketinq işlərini qazanmış “WPP” üçün böyük uğurdur.

Şirkət media ilə yanaşı, kreativ və istehsal biznesini, həmçinin kreator marketinqini də öz nəzarətində saxlamağa davam edir.

Məsələ ilə bağlı bəyanat verən “WPP”nin icraçı direktoru Sindi Rouz bu strateji tərəfdaşlığı daha da inkişaf etdirdikləri üçün qürur hissi keçirdiyini bildirib:

“Bizim əsas diqqətimiz bu etimadı hər gün qazanmağa yönəlib. “WPP Media”nın miqyasını “Open Intelligence” ilə birləşdirərək məlumatlara insani ölçü gətiririk. Bununla da tərəfdaşlarımız istehlakçılarının sadəcə kim olduğunu deyil, onları nəyin hərəkətə keçirdiyini də tam anlayırlar”, – deyə S.Rouz vurğulayıb.