“YouTube” süni intellektdən istifadə trendlərini açıqlayıb

“YouTube”un yeni araşdırmasına əsasən, son bir ildə video paylaşan 14–44 yaş arası istifadəçilərin 72%-i video və şəkillərin hazırlanmasında süni intellektdən yararlanır. ABŞ-də keçirilən sorğuda iştirakçıların 61%-i isə süni intellekt vasitəsilə özlərini video məzmunlara əlavə etməyə maraq göstərib.

Marklife.az xəbər verir ki, “YouTube”un “Culture & Trends” təşəbbüsü çərçivəsində “NRG” şirkətinə sifariş verdiyi araşdırmada son 12 ayda internetdə video paylaşan 14–44 yaş arası təxminən 700 nəfərin süni intellekt alətlərindən istifadə təcrübəsi öyrənilib.

Araşdırma göstərib ki, kontent yaradıcıları süni intellektdən özlərini fərqli obrazlarda göstərmək, yeni vizual ideyalar yaratmaq, eskizləri realistik görüntülərə çevirmək və video oyun səhnələrində iştirak edirmiş kimi görünmək üçün istifadə edirlər. Bəzi yaradıcılar isə bu texnologiya vasitəsilə bütöv kino dünyaları formalaşdırırlar.

“YouTube”un hesabatında bildirilir ki, sorğuda iştirak edən və süni intellektlə video hazırlayan istifadəçilərin üçdə ikisindən çoxu özlərini həmin məzmuna daxil edib. Platformanın fikrincə, bu imkan insanlara öz ideyalarını daha geniş auditoriyaya çatdırmaq və əvvəllər həyata keçirilməsi çətin olan yaradıcı layihələri reallaşdırmaq imkanı verir.