“Meta” platformalarında istifadəçi fəallığı artıb

“Meta”nın “Instagram”, “Facebook” və “Threads” platformalarında istifadəçi fəallığı yüksəlib.

Marklife.az “Social Media Today” nəşrinə istinadən xəbər verir ki, şirkətin 2026-cı ilin üçüncü rübünə dair hesabatında qısa videoların, fərdiləşdirilmiş kontentin və tövsiyə sistemlərinin inkişaf dinamikasına təsiri açıqlanıb.

Hesabat dövründə “Instagram”da hər istifadəçiyə düşən vaxt göstəricisi rekord həddə çatıb. “Reels” videolarının tövsiyə mexanizmindəki yeniliklər baxış müddətini 4 faizdən çox artırıb. Tövsiyə edilən videoların təxminən 45 faizi son 24 saat ərzində yayımlanan paylaşımlardan ibarət olub.

“Facebook”da da qısa videolara maraq artıb. Süni intellekt əsaslı tövsiyə mexanizmlərinin təkmilləşdirilməsi istifadəçilərə daha uyğun və aktual materialların təqdim olunmasına şərait yaradıb.

“Meta”nın baş icraçı direktoru Mark Zukerberq “Threads” platformasının aylıq aktiv istifadəçilərin sayına görə “X” sosial şəbəkəsini geridə qoyduğunu bildirib. Eyni zamanda, “Threads”də hər istifadəçiyə düşən vaxt illik müqayisədə 20 faizdən çox artıb.

Şirkət kontent yaradıcıları ilə əməkdaşlıq imkanlarını da genişləndirir. “Creator Marketing Hub” platformasında brendlərin tərəfdaşlıq qura biləcəyi 10 milyondan çox yaradıcı yer alır. “Meta AI Business Assistant” alətinin inteqrasiyası reklamverənlərə uyğun tərəfdaşların seçilməsi və kampaniyaların idarə olunması prosesində dəstək göstərəcək.