Markalar üçün yeni dövr: danışmaq yox, hərəkət etmək vaxtıdır
Həllin bir parçası ol! Brendlər “fərqindəlik” oyunlarını buraxıb real təsir yaratmağa başlayır
Son illərdə reklam və marketinq dünyasında “brend məqsədi” anlayışı böyük populyarlıq qazanmışdı. Lakin 2025-ci ildə keçirilən Cannes Lions festivalında bu mövzu artıq əvvəlki kimi ön planda deyil. Ekspertlər bildirirlər ki, şirkətlər artıq təkcə mesaj verməklə kifayətlənmir, real sosial dəyişiklik yaratmaq istəyirlər.
Artıq “fərqindəlik yaratmaq” sadəcə trend deyil. İstehlakçılar söz deyil, əməl görmək istəyir. Bu isə markalardan cəsarət, səmimiyyət və davamlılıq tələb edir.
Əlini daşın altına qoyan markalar
AXA “Three Words” adlı kampaniyasında çox sadə, amma güclü bir addım atdı. Şirkət 2,5 milyon ev sığortası müqaviləsinə “ailədaxili zorakılıq” hallarını da daxil etdi. Bu dəyişiklik minlərlə qadına real dəstək imkanı yaratdı və markanın sosial məsuliyyətini konkret addımlarla nümayiş etdirdi.
Natura “The Amazon Greenventory” layihəsi çərçivəsində süni intellekt və dron texnologiyalarından istifadə edərək Amazon meşələrindəki nadir bitkiləri xəritələndirdi. Şirkət bu məlumatı yerli icmalarla bölüşərək, həm təbiətin qorunmasına, həm də bölgə sakinlərinin rifahına töhfə verdi.
Spotify “Sounds Right” layihəsində təbiəti rəsmi “sənətçi” kimi tanıtdı. Platformada təbiət səslərindən istifadə olunduqda, həmin gəlirin bir hissəsi ekoloji layihələrin maliyyələşdirilməsinə yönəldilir. Bu yanaşma musiqi sənayesində tamamilə yeni bir sosial məsuliyyət modelidir.
Dove isə artıq 20 ildir ki, qadınların özünə inamını gücləndirməyə yönəlmiş kampaniyalarla çıxış edir. Brend sadəcə reklam etmir – ictimai şüuru dəyişdirməyə çalışır.
“Fərqindəlik” dövrü bitdi – real məsuliyyət dövrü başlayır
Marketinq mütəxəssislərinin fikrincə, markalar artıq təkcə “yaxşı görünmək” üçün sosial məsələlərə toxunmaqla kifayətlənməməlidir. Əsl dəyər real risk almaqda, vaxt və resurs sərf etməkdə, cəmiyyətə konkret fayda verməkdədir.
Tanınmış yazıçı Nassim Nicholas Taleb “Taşın altındakı əl” (ing. Skin in the Game) anlayışı ilə bunu belə izah edir: kim həqiqətən inanırsa, risk alır. Brendlər üçün də eyni prinsip keçərlidir – dəyərli olmaq istəyirsənsə, məsuliyyət daşımalısan.
Yeni dövrün brendləri
Dove kimi markalar illərlə davam edən, səmimi məqsədləri sayəsində həm istehlakçı etimadını, həm də yaradıcılıq mükafatlarını qazanırlar.
Digər tərəfdən, bir vaxtlar qadınları obyekt kimi göstərən Axe, kommunikasiya dilini dəyişərək daha inklüziv və yumorik bir istiqamətə keçib. Bu dəyişiklik brendin imicini yenidən gücləndirib.
Beləliklə, “brend məqsədi” anlayışı tükənmir — sadəcə daha real və səmimi formaya çevrilir.
Bu dövrdə qalib gələnlər isə sadəcə danışanlar deyil, həllin bir parçası olanlardır.
İhsan Özçıtak.
