Çində köhnə telefonların RAM çipləri yenidən istifadə olunur

Çində RAM çiplərinin kəskin bahalaşması smartfon istehsalçılarını köhnə telefonların yaddaşını sökərək yeni cihazlarda istifadə etməyə yönəldib. Məlumata görə, bəzi şirkətlər 5–6 il əvvəl istehsal edilmiş telefonlardan çıxarılan işlək yaddaş çiplərini büdcə modellərinə quraşdırmağı nəzərdən keçirirlər.

Marklife.az xarici mətbuata istinadla xəbər verir ki, bu addım mobil cihazlarda istifadə olunan LPDDR yaddaşlarının qiymət artımı və təchizat çətinlikləri ilə əlaqələndirilir. İstehsalçılar köhnə komponentləri yenidən dövriyyəyə qaytarmaqla xərcləri azaltmağa çalışırlar.

Proses zamanı yaddaş çipləri köhnə telefonların ana platasından çıxarılır, texniki yoxlamadan keçirilir və yeni cihazlara lehimlənir. Lakin uzun müddət istifadə edilmiş komponentlərin etibarlılığı ilə bağlı risklər onların əlavə sınaqlardan keçirilməsini zəruri edir.

Çinin Şençjen şəhərindəki Huaqiangbei elektronika bazarının köhnə yaddaş çiplərinin alqı-satqısında mühüm rol oynadığı bildirilir. Bununla belə, hansı istehsalçıların bu üsula keçdiyi və onun yeni smartfonlarda nə qədər geniş tətbiq olunduğu hələlik dəqiq təsdiqlənməyib.